Skip to main content

Gogol Xaar

Waagii aad yarayd ma cayaari jirtay Jarta?

Cayaartu waxa ay ka samaysantahay haykal lagu shaxnaday safiito, dhulka, iwm; taas oo ku xardhan afargeesyo 5x5 ah. Guud ahaan 25 god ayaa ku yaal haykalka. Godkiiba hal ciidan ah oo kaliya ayaa markiiba gali kara. Labo qof ayaa markiiba ku tartama cayaartan. Qofkiiba waxa uu haystaa 12 ciidan. Ciidan waliba waxa uu leeyahay midab u gooni ah. Qaabab kala duwan ayaa ciidanka loo geeyaa goobta oo loo dagaa godadka: daadsi ama tookeysi. Ciidanka waxaa loo dhaqaajin karaa oo kaliya afrta jiho midig, bidix, horay, gadaal. Qofkii dhaqaaqi kari waaye (afarta jiho laga xiro) waa uu gudbinayaa tookadiisa.

Si aad uga guuleysato qofka kuu baxaya waxa aad raaci jirtay tallaabooyin ku salaysan sharciga jarta. Sharciga guuleysashadu waxa uu ku xiranyahay nuuca jaraha: kabood mise duqays. Laakiin habka aad u hawlgalineyso ciidankaaga adiga ayaa u madax banaan! Qof waliba kaarto iyo farsamo u gooni ah ayuu adeegsadaa si uu ugu been guuro lalloolamahiisa kadibna uu uga adkaado!

Jar Elegtaroonig ah​

Haddaba haddii aad dooneyso in aad sameyso Jar Elegtaroonig ah (tusaale ahaan: mobile app, web app, desktop app), maxaa kula gudboon?

Xogdhisme​

Sidee ayaad ugu matalaysaa haykalkii safiitada/dhulka lagu shaxnadi jiray cayaarta Jarta qaab barogaraam ahaana?

  • Si aad ugu matasho haylkalka cayaarta iyo xaalkeeda qaab elegtaroonig ah, waxa aad u baahantahay data structures (Xogdhisme).
  • Xogdhismuhu waa habka xogta loogu qaabeeyo meemoriga kumbuyuutarka. Sidee ugu matalee qof, ciidanka, xaalka (nolol/lacunay), godadka jarta, iwm. qaab elegtaroonig ah?

Algorisme​

Kaba soo qaad in barogaraamku uu la cayaari karo qof; habkee ayaad u farsamaynee tallaabooyinka uu qaadi lahaa barogaraamku si uu uga guuleyso qofka la cayaaraya?

  • Si aad u samayso barogaraam ka guuleysan kara marwaliba latartameyaashiisa, waxa aad u baahantahay in aad curiso Algorisme kuu suurta galinaya arrinkaas.
  • Algorisme waa hab leh tallaabooyin qayaxan oo la qaado si loo xalliyo barobaleem ama loo gaaro ujeeddo. Tallaabooyin nuucee ah ayuu qaadayaa barogaraamku si uu uga guuleysto latartamaha?

Xogshismaha iyo Algorismuhu waa far iyo faraanti! Waanu u baahannahay in dhammaan xogta aanu adeegsaneyno ku keydinno xogdhisme ku habboon, algorismana ka adeejinno si aanu u helno natiijdada aanu dooneyno.

Samaynta softiweer qabta shaqadii loo sameeyay wax sahlan maahan! waa xirfad iyo farsamoyaqaannimo cajiib ah oo looyaqaan Injineeriyadda Softiweerka. Xogdhisme iyo Algorisme waa aasaaska farsamadaan qiimaha badan.

Ku soo dhawow Injireeyidda Softiweerka!